ՔԿ-ն վարույթ է հարուցել Ամենայն Հայոց Կաթողիկոսի վերաբերյալ ձայնագրության հիման վրա

Հոկտեմբերի 17-ին Նաթան արքեպիսկոպոս Հովհաննիսյանի և Գարեգին Բ-ի նախկին գավազանակիր Աղան աբեղա Երնջակյանի՝ ԶԼՄ-ներում տարածված ձայնագրության հիման վրա Քննչական կոմիտեն վարույթ է հարուցել։ Այս մասին ՍիվիլՆեթին հայտնեցին Քննչական կոմիտեից։

Իշխանական լրատվամիջոցները տարածել էին 2023-ի հոկտեմբերի հեռախոսազանգի ձայնագրություն։ Ձայնագրության մեջ Աղան աբեղա Երնջակյանն ասում է, որ Գարեգին Երկրորդն իրեն ստիպել է մասնակցել Նիկոլ Փաշինյանի դեմ հանրահավաքի։

Վարչապետի ընտանիքին պատկանող Հայկական Ժամանակը հարցում էր արել և ՆԳՆ-ից տեղեկացել, որ ՆԳՆ ոստիկանությունը հանցագործության մասին հաղորդում է ներկայացրել Քննչական կոմիտե։

Քննչական կոմիտեից հայտնեցին, որ հաղորդման առթիվ նախաձեռնվել է քրեական վարույթ՝ Քրեական օրենսգրքի 236-րդ հոդվածի 3-րդ մասի հատկանիշներով, այն է՝ իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով հավաք անցկացնելուն կամ դրան մասնակցելուն խոչընդոտելը կամ հարկադրելը, ինչպես նաև հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելը:

The post ՔԿ-ն վարույթ է հարուցել Ամենայն Հայոց Կաթողիկոսի վերաբերյալ ձայնագրության հիման վրա appeared first on CIVILNET.