ԵԱՀԿ Մինսկի խմբի գործունեության մեջ երբեք չի եղել որևէ օգտակար բան. Փաշինյան

Հայաստանի վարչապետ Նիկոլ Փաշինյանը ԵԱՀԿ Մինսկի խմբի գործունեության մեջ չի տեսել որևէ օգտակար բան:

Նման հայտրարություն նա արել է ԱԺ–կառավարություն հարցուպատասխանին: 

«Հետահայաց վերլուծելով՝ պետք է ասեմ, որ ԵԱՀԿ Մինսկի խմբի գործունեության մեջ չեմ տեսնում որևէ օգտակար բան: Չի եղել այդ խմբի գործունեության մեջ երբեք որևէ օգտակար բան: Այդ խմբի գործունեությունը եղել է նրա համար, որ կոնֆլիկտը խորանա և դառնա լծակ՝ մարիոնետային իրավիճակում պահելու ոչ միայն Հայաստանը, այլ նաև ողջ տարածաշրջանը»,–ասաց Փաշինյանը:

Նա կարծում է, որ Ղարաբաղի հարցը վաղուց լուծված է եղել: «Մեզ չեն ասել դրա մասին: Եթե լուծված է եղել, ինչո՞ւ չեն ասել, որովհետև օրակարգում է եղել Հայաստանի հարցը: Ինչպե՞ս լուծել Հայաստանի հարցը: Ի՞նչ էր լինելու Հայաստանի հարցի լուծման արդյունքում: Լինելու էր Հայաստանի տարածքային ամբողջականության մասնատում և ինքնիշխանության ու անկախության կորուստ»,–նշեց վարչապետը: 

Նա հավելեց՝ ԵԱՀԿ Մինսկի խմբի ձևաչափով տեղի ունեցած բոլոր բանակցությունները նրա մասին են եղել, որ հայկական կողմի բոլոր կախվածությունները կրկնապատկվեն, եռապատկվեն, քառապատկվեն, հնգապատկվեն ու տասնապատկվեն: 

«Այսօր ՀՀ–ն անկախ է՝ ավելի, քան երբևէ, պետություն է ավելի, քան երբևէ, ինքնիշխան է՝ ավելի, քան երբևէ, և դա այդ թվում մեր նահատակների զոհողությունների շնորհիվ»,–ամփոփեց Փաշինյանը:

***

Սեպտեմբերի 1-ին ԵԱՀԿ նախարարների խորհուրդը որոշել է լուծարել Մինսկի խումբը։ Նախարարների խորհրդի որոշումը ընդունվել է ԵԱՀԿ 57 մասնակից պետությունների կոնսենսուսով։

ԵԱՀԿ նախարարների խորհուրդը որոշեց փակել Մինսկի խումբը

The post ԵԱՀԿ Մինսկի խմբի գործունեության մեջ երբեք չի եղել որևէ օգտակար բան. Փաշինյան appeared first on CIVILNET.