ՀՀ դրոշմակնիքը պետք է զերծ լինի հուզական սիմվոլներից․ Արթուր Հովհաննիսյան

Նոյեմբերի 1-ից ՀՀ պետական սահմանահատման կնիքի վրա այլևս չի լինի Արարատ լեռան պատկերը։ Խորհրդարանական ճեպազրույցի ժամանակ Կառավարության այս որոշումը պարզաբանել է «Քաղաքացիական պայմանագիր» խմբակցության պատգամավոր Արթուր Հովհաննիսյանը։

Նրա խոսքով՝ Հայաստանի Հանրապետության դրոշմակնիքը, որը տպվում է անձնագրում, պետք է արտահայտի բացառապես ՀՀ պետական սիմվոլները։ 

«Հայաստանի Հանրապետությունը ելնում է իր պետական սիմվոլներից, և Հայաստանի Հանրապետության դրոշմակնիքը պետք է արտահայտի Հայաստանի Հանրապետության պետությանը վերաբերող սիմվոլիզմը, պետական սիմվոլները և, ուրեմն, զերծ լինի նաև էմոցիոնալ, հուզական սիմվոլներից», – ասել է Հովհաննիսյանը։

Պատգամավորը նշել է, որ այս քայլի նպատակն է բացառել Հայաստանի Հանրապետության վերաբերյալ հնարավոր տարընկալումները։ 

«Մենք ամեն բան անում ենք, որ մեր կողմից կիրառվող սիմվոլիզմը, կնիքները և այլն, ելնեն բացառապես պետականության սկզբունքից», – հավելել է նա։

Անդրադառնալով տարածաշրջանային հարաբերություններին՝ Հովհաննիսյանը շեշտել է. «Մենք հիմնվում ենք Ալմա Աթիի հռչակագրի վրա մեր հարևանների հետ հարաբերություններում, և մեր յուրաքանչյուր գործողություն, կլինի դա կնիքի ձևով, հայտարարության ձևով, որևէ կերպ պետք է  վտանգավոր մեսիջներ չուղարկի Հայաստանի Հանրապետության հարևան պետություններին»։

Հովհանիսյանի խոսքով՝ Հայաստանը միջազգայնորեն ճանաչված սահմաններով սուվերեն պետություն է, և երկիրը ներկայացնող կնիքները պետք է արտացոլեն պետական սիմվոլները։

«Ցավում եմ, որ էլի որոշ շրջանակներ այս պարզ տրամաբանությունը շատ լավ իմանալով փորձում են հաղորդել էմոցիոնալ և հուզական ֆոն, որևէ դավադրություն չկա այս պատմության մեջ, պետք չի սրան էմոցիոնալ և հուզական ֆոն տալ», – նշել է իշխանական պատգամավորը։

Լրագրողի հարցին, թե արդյոք Արարատ լեռան պատկերը կհանվի միայն կնիքից, թե քննարկվում է նաև զինանշանից հանելու հարցը, Արթուր Հովհաննիսյանը պատասխանել է. «Նման քննարկում գոյություն չունի»։

The post ՀՀ դրոշմակնիքը պետք է զերծ լինի հուզական սիմվոլներից․ Արթուր Հովհաննիսյան appeared first on CIVILNET.