ՀԲԸՄ-ն մտահոգություն է հայտնում պետության և եկեղեցու միջև սրվող իրավիճակի կապակցությամբ

Հայկական բարեգործական ընդհանուր միությունը (ՀԲԸՄ) հայտարարություն է տարածել՝ խոր մտահոգություն հայտնելով Հայաստանում զարգացող իրադարձությունների, մասնավորապես՝ պետության և Հայ առաքելական եեղեցու միջև սրվող իրավիճակի առնչությամբ։

Հայտարարությունում ՀԲԸՄ-ի կենտրոնական վարչությունը նշել է, որ պետությունը և եկեղեցին, հայկական սփյուռքի հետ միասին, կազմում են հայ ժողովրդի գոյության երեք հիմնասյուները։ Կազմակերպությունը կոչ է արել զսպվածության և ազգային միասնության պահպանման՝ ընդգծելով, որ անհրաժեշտ է հարգել ինչպես Հայաստանի Հանրապետության Սահմանադրությունը և դրա ժողովրդավարական գործընթացները, այնպես էլ Հայ առաքելական եկեղեցու ինքնավարությունը, կանոնները և ընթացակարգերը, որը «ավելի քան 1700 տարի եղել է հայկական ինքնության անսասան հենասյունը»։

«Ցանկացած գործողություն, որը կարող է թուլացնել թե՛ պետությանը, թե՛ եկեղեցուն՝ իր առաքելությունը իրականացնելու ունակության մեջ, այդ թվում՝ վերջին օրերին բարձրաստիճան հոգևորականների ձերբակալությունները և Ամենայն հայոց կաթողիկոսին ուղղված սպառնալիքները, սպառնում է թուլացնել մեր պետությունը՝ թե՛ ներքին, թե՛ միջազգային մակարդակներում»,- ասված է հայտարարությունում։

ՀԲԸՄ-ն ընդգծել է, որ աշխարհաքաղաքական անորոշության այս փուլում անհրաժեշտ է ամրապնդել ազգային հիմնարար հաստատությունները, որպեսզի «յուրաքանչյուրը կարողանա կատարել իր դերը ժողովրդի զարգացման գործում»։

Հայտարարությունը եզրափակվում է կազմակերպության հիմնադիրների կարգախոսով՝
«Ուժը միասնության մեջ է»։

The post ՀԲԸՄ-ն մտահոգություն է հայտնում պետության և եկեղեցու միջև սրվող իրավիճակի կապակցությամբ appeared first on CIVILNET.